Հեռավար քննարկում Եվրոպայի առաջնությունների վերաբերյալ

Ապրիլի 19-ին կայացավ ՖԻԲԱ-Եվրոպայի կողմից կազմակերպված hեռավար քննարկում, որը նախատեսված էր վարկանիշային աղյուսակի 33-ից 50-րդ տեղերում գտնվող երկրների համար: Մասնակիցների թվում էր նաև Հայաստանը:

Քննարկման հիմնական թեման ամռանը նախատեսված Եվրոպայի պատանեկան և երիտասարդական առաջնությունների անցկացումն էր:

ՀԲՖ գլխավոր քարտուղար Արթուր Նազարյանը ներկայացրեց, թե ինչ իրավիճակ է հայկական բասկետբոլում: ՀԲՖ գլխավոր քարտուղարը հայտնեց, որ Հայաստանի պատանեկան և երիտասարդական հավաքականները պատրաստ են ամռանը մասնակցել Եվրոպայի առաջնություններին, եթե դրանք տեղի ունենան ըստ նախատեսվածի: Հայաստանն այն եզակի երկրների թվում է, որտեղ բասկետբոլային կյանքը լիովին վերադարձել է բնականոն կյանքին:

Քննարկմանը մասնակից մի շարք երկրներ հայտնեցին, որ ի վիճակի չեն լինելու մասնակցել միջազգային ստուգատեսների:

Հայտնի դարձավ, որ մայիսի սկզբին ՖԻԲԱ-Եվրոպայի գործադիր կոմիտեն կկայացնի վերջնական որոշում պատանեկան և երիտասարդական առաջնությունների վերաբերյալ: