Համահայկական խաղեր. Վազգեն Հովհաննիսյանը ներկայացրել է «Բեյրութի» և «Անթիլասի» կազմերը
2023-08-06 22:14
Մեկնարկում են համահայկական 8-րդ խաղերը: Բասկետբոլի տղաների մրցաշարում Լիբանանից ժամանած թիմերից են «Բեյրութ»-ը և «Անթիլաս»-ը: Այս ակումբների ղեկավար Վազգեն Հովհաննիսյանը ՀԲՖ մամուլի քարտուղարության հետ զրույցում անդրադարձել է իրենց մասնակցությանը և խոսել թիմերի կազմերի մասին:
«Մեծ անհամբերությամբ էինք սպասում այս խաղերին և լիահույս ենք, որ մեզ կհաջողվի շատ հաղթանակներ գրանցել։ Ես ղեկավարում եմ Լիբանանից ժամանած երկու թիմ՝ «Բեյրութ»-ը և «Անթիլաս»-ը:
Համահայկական խաղերի համար նախապատրաստական մարզումները տևել են մեկ ամիս։ «Անթիլաս»-ում կներկայանան հիմնականում երիտասարդ խաղացողներ: Մեծ հույս ունեմ, որ իրենց առավելագույնս կներկայացնեն։ Նրանց համար այս խաղերում հանդես գալը շատ հետաքրքիր փորձ կլինի։
Իսկ «Բեյրութ»-ի թիմում խաղում են ինչպես երիտասարդ, այնպես էլ փորձառու խաղացողներ։ Շատ մարտական են տրամադրված և հաղթանակի հույսով։ Բոլորիս նպատակը նույնն է՝ հաղթել յուրաքանչյուր խաղում»,- ասաց թիմերի ղեկավար Վազգեն Հովհաննիսյանը:
Վազգեն Հովհաննիսյանը նաև ներկայացրել է թիմերը կազմերը:
Թիմերը հանդես կգան Ժան-Ժակ Հակոբյանի գլխավորությամբ, իսկ Արման Չերչյանը կլինի գլխավոր մարզչի օգնականը:
Հիշեցնենք, որ համահայկական 8-րդ ամառային խաղերում ներառված բասկետբոլի մրցումները կանցկացվեն օգոստոսի 7-ից 18-ը։ Տղամարդկանց մրցաշարին կմասնակցեն 30 թիմեր: